علي جدران نفسيتي

بقالي كتير مكتبتش في المدونه يعني بسبب الامتحنات وكمان معنديش حاجه اقولها

بس فيه حاجه مضيقاني الايام دي

هي بصراحه مضيقاني من زمان وهي التناقض الي انا فيه في الافعال والاقول يعني مثلا اروح الجيم الصبح واشرب سجاير بلليل

هل الانسان محتاج لايه عشان يكون عنده اراده من حديد طب والنبي__ههه فيه ناس تقولك ان الي بيقول والنبي حرام عليه___والنبي والنبي والنبي لو فيه حد عنده اراده قويه يقولي اعملها ازاي دي

وبمناسبة كلمة والنبي

فا انا مش بحلف باسم النبي عليه الصلاة والسلام انا بحلفك بغلوته عندك ودا مش قسم

انا مش مش بقول

والنبي هعمل كذا والنبي مش هعمل كذا

انا بقولك وغلاوة النبي عندك

متحبكوهاش اوي كده

*

الاغاني حرام تلت اربع الناس الي بتسمع اغاني متفقه علي كده

طب بيسمعوها ليه

طب كلمات الاغاني حرام ولا الموسيقي الي حرام

ولا كل ما يلهو عن ذكر الله فهو حرام

ربنا خلق الموهبه وبالتالي هنلاقي واحد عنده موهبه شعريه والتاني موهبه موسيقيه

بيعرف يقول كلام حلو والتاني ربنا ميزه بالصوت الجميل

والتالت بيعرف يلحن الاغنيه بطريقه جميله

استخدام الموهبه هوه الي حرام

ولا الاستخدام السئ

طب ايه الضرر لما اسمع اغنيه__وحسنه حسن وقبيحه قبيح ا ل خ

@

فيه عربية رش لقتل الناموس وهي عباره عن جاز محروق علي شكل دخان

الدخان ده مليون في الميه مضر بالصحه دا بالنسبه للي مش بيدخنو

في يوم ركبت المتروقال ايه الاجره بثمن اقل بخمسه وسبعين قرش ليه يا خزيه عشان الاحتفال بيوم البيئه العالمي

واكيد طبعا الكلام ده طبقوه في محطات القطارت

طب والله العظيم ما فيه مكان في الجمهوريه بيئه زي المترو او القطار

خاصة خط المرج ابن الجزمه

والقطار خط الزقازيق

زحمه موووووت والناس بتموت والتكيف مش شغال والناس ساحبه الهوي اصلا وواقفين علي رجول بعض

وواحد عامل فيها عم الارندلي وقاعد يعيب علي الناس

وهوه اصلا نسي انه من ضمن الزحمه يعني انا بالنسبه لغيري بعمل زحمه في نفس الوقت هوه بالنسبالي عامل زحمه

وكل واحد شايف ان القطار او عربية المترو بتاع الي جابته الست الوالده الي مرميه في البيت بتعمل كووووووسه

&

اجي اركب البيجو وعددها 7 راكب

الاقي واحد جاي

والسواق بيقول معلش خدوه جمبكو

ازعلللللللللللل اوي اوي عشان الدنيا حر ومش ناقصين تزنيق

حصل وكنت متاخر ويدوبك العربيه ماشيه ومفيش بعدها في الموقف

ولاقيت نفسي راكب مع الناس وهما زهقانين عشان في واحد زياده الي هوه انا

قلت دنيا ودواره

والي ترضاه لنفسك ارضاه لغيرك

$

بحط صور احضان وبوس علي الايميل وفي الي بنتقد ده وبييقولي ياعم ايه ده

وانا طبعا شايف انها عادي والي مش عارفين نعمله في الحقيقه__مش بتكلم عن نفسي__نجيب صور ونتفرج عليها لحد ما ربنا يفرجها

ونخلص جيش ونخلص جامعه ونشتغل ونتجوز علي 30 سنه

ونمارس حياتنا الطبيعيه 10 سنين بالكتير بعد كده المنشطات الجنسيه تشتغل يومين وبالتالي اضرار علي القلب ونموت علي خمسين ستين واهي كلها اعمار

8

هاقوم اعمل شاي وارجع ارغي

لحد ما الميه تغلي اكمل

فيه عنوان في جورنال ارشه علي ترابيزه كل ما اروح اعمل شاي اقراه واتنرفززز اوي

الاضراب في مصر حق يساااااء استخدامه

ازاي يساء استخدامه هما الي بيعملو اضراب مش ليهم مطالب وهما ناس اصلا بيخدمو الشعب زي سواقين القطارات او او او مش ليهم مطالب

ولا يعملو اضراب وانا مالي اهئ

وبس علي كده يعني اضراب من غير اضراب مش هيحقق هدف الاضراب

اروح اجيب الشاي بقي

بكره اكمل ما هو اخيرا قدرت اتنفس
ما احلي التنفيس