الشعب المصري الترحمي

هوه احنا ليه كل واحد يموت او يخلع نقول ((الله يرحم ايامه))دا كان وكان نقعد بقي نقول اهو احسن من الموجود دلوقتي رغم اخطائه

يعني لما جمال عبد الناصر كان موجود كان في ناس بتكرهه بكل معاني الكلمه وناس من الشعب نفسه يعني مثلا والدي حكي لي ان لنا قريب كان يكره جمال عبد الناصر لدرجة انه كان بيحط الجزمه بتاعته علي صورته ,ايوه علي صورة جمال

ولما جمال مات وجه السادات بقي يترحم علي ايام جمال وحلاوة ودلع ليالي جمال

وايام السادات بردو كان فيه الي بيكرهه وعايز يقتله كمان رغم انه حارب وانتصر ومسلمش من انتقدات الشعب لدرجة انهم طلعو عليه نكت

ولما مات وجه حسني مبارك الكل بيترحم علي ايام السادات ويقولو دا لو كان عايش كنا وكنا وكنا وبقينا احسن من دلوقتي

طيب ولما يجي الي بعد حسني مبارك هنترحم علي ايامه هوه كمان رغم كل الي احنا فيه ولا يمكن احنا شايفين اننا في وضع وحش بينما احنا مية فل وستاشر ولما يجي الي بعده هنكرهه لما الوضع يزداد قرفا وهما ونكدا وبلاوي ومصايب

لما كمال الشاذلي كان موجود في مجلس الشعب قالو عنه وعنه وعنه ولما جه احمد عز قالو الله يرحم ايام كمال كان احسن منه

الخلاصه بس عشان انا اساسا زهقان

يعني احنا بنشوف كل يوم اوحش من اليوم الي قبله

ونقول علي اليوم الي قبله كان احسن من دلوقتي

رغم ان دلوقتي ممكن يكون احسن من بكره

طب بكره هيجي حلو ليه يعني كان دلوقتي جه احسن من الي قبله

طب هوه بكره هيجي حلو ليه يعني هو احنا الي كوييسن

من انفسكم سلط عليكم

العباره في الدوباره بتقول ايه

خليك حلو عشان بكره يبقي حلو

هتبقي وحش بكره هيكون اوحش