انا والخوف والعفريت

بتخاف من العفاريت؟
ايوه
شوفت عفريت قبل كده؟
لاء
أكيد حد حكي ليك قصص الاشباح
يوووه كتير
انت مصدق القصص دي؟
ايوه طبعا ومتأكد من الي حكي ليه ومصدقه
يعني انت مؤمن بأنك ممكن تصدق بحاجه مشوفتهاش ؟
أكيد مدام متأكد من الي قال
في خيالك كده ايه شكل العفريت ؟
مش عارف اصلي ماشفتوش بقولك
طيب انت خايف يعملك ايه لو جالك عفريت؟
خايف يعمل حركات مرعبه زي مثلا يجي من ورايا
او يحرك حاجات او اسمع صوت خبط ورزع في ماكن في الشقه او يظهرلي علي شكل اي حاجه قطه سوده كلب اسود ثعبان
الحجات دي كلها سمعت عنها في القصص الي اتحكت ليك او شفتها في الافلام؟
كل ده انا سمعت بيه ومنه الي شوفته في الافلام
قصه اتحكت ليك مرعبه؟
حكاية انتي رايحه فين يا تهاني
ودي بقي كان في واحده ست ماشيه في طريق مقطوع الصبح بدري قوي
وسمعت خطوات سريعه وراها تبص متلاقيش في حد تبص متلاقيش في حد
وفجائه سمعت صوت في ودنها
انتي رايحه فين يا تهااااني
صرخة قوي وبصت وراها بسرعه من كتر الرعب الي هيه فيه
ملاقتش حد وبصت في البحر لاقت واحده شكلها عجوز بتغوص في الميه بلا عوده
ومن يومها والست دي اتجننت
بتخاف من الضلمه ؟
اه طبعا وانا صغير كنت بنام ونور اللمبه شغال
بس لما كبرت بقي في نور سهاري
بتخاف من الضلمه ليه؟
عشان مش بشوف فيها حاجه وخايف حد يكون جمبي وانا مش شايفه
الحد ده ممكن يكون عفريت تقصد؟
ايوه واتسرع من الخطه
طب ليه العفاريت بتظهر بلليل بس ؟
مش عارف بس يمكن عشان بيكون مفيش ناس كتيره
يعني لو في ناس مش بتطلع او لا بتكون لوحدك بيستفردو بيك؟
ايوه بالظبط كده
هما مين الي بيستفردو بيك ؟
العفاريت طبعا
ومتقولش ليه ان دي وساوس وبتعملك تخيلات !
أحتمال تكون وساوس بس ممكن تكون حقيقيه
***************************
انا كنت بحاول اكلم نفسي عن موضوع الخوف في حياتي
انا بخاف من العفاريت دي حقيقه رغم اني ساكن لوحدي في شقه كامله طول الوقت
انا بخاف حتي احكي قصص العفاريت والاشباح
قلت اكتب وانا خايف وكمان اطفي النور ومبيقاش الا نور شاشة الكومبيوتر
واما نشوف رغم كل الرعب الي انا فيه دلوقتي مستني عفريت يطلعلي
عارف انه مش هيطلعلي دلوقتي بس هيتنس لما افتح النور
والاقيه واقف في وشي واصرخ ويغمي عليه
بيني وبينكم انا خايف اقوم افتح النور